Prisa våren og sommaren med festmåltid
- Vi håper maten fell i smak. Om vi har lukkast, det er det de sjølve som avgjer når de får maten servert, sa hovmeister Niklas Werner. Og elevane på Vg2 kokk- og servitør lukkast stort med eit imponerande spekter av aperitiff, forrettar, hovudrettar og dessertar, der dei prisa våren og sommaren med festmat.
Det har rukke å bli til ein tradisjon, familiemiddagen som på sett og vis rundar av skuleåret for elevane på Vg2 KO ved Herøy vgs. Torsdag 1.juni var datoen for årets høgdepunkt.
Menyen var heilt ypparleg, med Mozell Krusflik som aperitiff og første smaksprøve. Gjestane – foreldre, besteforeldre, kjærestar og andre – fekk servert smakfull laksepastrami, skvalderkål- og brenneslesuppe, posjert vaktelegg og kryddersild, grilla villkveite, vår-sorbet, lammecarrè og braisert kje, rabarbrasuppe med rognebladis og bær, samt konfekt.
Hovmeister Niklas leia gjestane gjennom kvelden på ein naturleg god og humoristisk måte, og han introduserte første forrett, som mellom anna er laga av ugras.
- Dette svineriet har vi kokt suppe av; skvalderkål med brennesle, med tilhøyrande crème fraîche og fyrstikkpotet. Vi har satsa på næringsrik og kortreist mat, fortalde han.
Grilla villkveite, lam og kje
- Kveita har vi marinert og grilla, og laga verdas beste skaldyrsaus til; den er så god at du kanskje får lyst til å slikke av fatet etterpå, opplyste hovmeisteren før første hovudrett kom på bordet. Og det smakte!
Innimellom alle rettane følgde ein glimrande parodi av kokkelærar Ingebjørg Lyster, regissert av elev Håkon Skoge, ein liten quiz eller to, og ein liten vår-sorbet av engsyre og gauksyre, som ein hyllest til våren. Hovmeisteren fortalde vidare; - dette er den ultimate smaken av vår og sommar. Ein liten applaus til Danuta for å ha rydda hagen for ugras!
Så følgde andre hovudrett, kjøt, knallgod lammecarrè og braisert kje, noko som var både kortreist og berekraftig mat, fekk vi vite.
Som avrunding kom desserten på bordet, i form av rabarbrasuppe saman med rognebladis servert på italiensk marengs og friske bær. Og som ikkje det var nok, fekk familie og vener konfekt i tillegg.
- Gi gass!
Familiemiddagen vart ein uforgløymeleg kveld med framifrå smaksopplevingar. Elevane på Vg2 KO er knallgode på kjøkkenet og er også ein triveleg og humoristisk gjeng. Lærar Ingebjørg Lyster takka naturlegvis elevane for den flotte kvelden vi fekk ta del i.
- Gi gass! Eg trur dokke var klare for å berre køyre på i dag, og det har vore ein lang dag, ein travel dag. Her kan vi ikkje klage på noko som helst, dette vart suksess! De har vore flinke til å fordele ansvar, de har kome på menyen sjølve, og de har stått for underhaldninga sjølve. Vi har utfordra elevane i fleire år om å drive litt ap med oss lærarane. Du tok utfordringa Håkon, og parodien din var kjempebra, oppsummerte Ingebjørg om det å bli parodiert.
Ei stor, stor takk til årets elevar på Vg2 kokk- og servitørfag som sytte for ein fantastisk kveld med prima mat og underhaldning i Restaurant Lykken ved Herøy vgs. Dei er Leiv Magne Apelseth, Even Gaustad, Nikolei Gratzke, Ovar Hatløy, Jørund Sivertsen Skarbakk, Håkon Skoge, Isabell Sporsheim, Hans OIav Sundal, Enrico Trettø, Adriana Wajchert og Niklas Werner.